' ജൈവീകം ' .....

ജയന്റ് വുഡ് സ്പൈഡര്‍ (Nephila pilipes)

2009-09-24T22:26:00.009+04:00

അന്തോണിച്ചന്റെ ബ്ലോഗ് പോസ്റ്റ് (ഇതെന്തു വാര്‍ത്ത? ) ആണ് ഈ പടങ്ങള്‍ പ്രസിദ്ധീകരിക്കാന്‍ എന്നെ പ്രേരിപ്പിച്ചത്. ജൈവീകത്തില്‍ മീനുകളൂടേതല്ലാത്ത ആദ്യ പോസ്റ്റ് ആണിത്.

Golden orb-web spider വിഭാഗത്തില്‍ പെട്ട Nephila pilipes അഥവാ Giant wood spider ആണിത് .
Family: Tetragnathidae

ഇത് ചെറിയ ഒരു ചിലന്തിയാണ്. അതിന്റെ ഈ നിറം ക്രമേണ മാറി വരും.

ഇപ്രാവശ്യം നാട്ടില്‍ പോയപ്പോള്‍ തൊടുപുഴക്കടുത്ത് മുള്ളരിങ്ങാട് എന്ന സ്ഥലത്തിനടുത്ത് ഒരു ബന്ധു വീട്ടില്‍ പോയിരുന്നു. മലനാടിന്റെ എല്ലാ പ്രകൃതി ഭംഗികളും ഉള്ള ഒരു സ്ഥലം.

രാവിലെ പറമ്പിലേക്ക് ഒന്നു നോക്കിയപ്പോള്‍ വംശനാശം വന്നു കൊണ്ടിരികുന്നത് എന്ന് മാതൃഭൂമി എഴുതിയ ഈ ഭീമന്മാര്‍ ഓരോ മരത്തിന്റെ അടുത്തും ഓരോ വലിയ വലയും നെയ്ത് ഇരിക്കുന്നത് കണ്ടു. പലതിനും പല നിറമായിരുന്നു. പല വലിപ്പവും.

ഇവയെ പറ്റിയുള്ള വിവരങ്ങള്‍ അന്തോണിച്ചന്റെ പോസ്റ്റില്‍ നിന്നു മനസ്സിലാക്കം. ബാക്കി വിക്കിയിലെ ഈ ലേഖനം നോക്കൂ.

ഈ കാണുന്നവള്‍ വലുപ്പം വച്ച ഒരെണ്ണം തന്നെ,, ഇതല്ലേ ശരിക്കും Giant Wood Spiders

പെണ്‍ ചിലന്തികള്‍ അന്‍പത് മില്ലീമീറ്റര്‍ വരെ വളരുമ്പോള്‍ ആണ്‍ ചിലന്തികള്‍ക്ക് അഞ്ച്-ആറ് സെന്റിമീറ്റര്‍ ആണ് വലിപ്പം എന്നത് ശ്രദ്ധേയമാണ്. ഈ പടത്തില്‍ താഴെ കാണുന്നതാണ് ആണ്‍ ചിലന്തി.

കല്ലടമുട്ടി (Anabas Testudineus /Climbing perch)

2009-06-15T16:56:00.003+04:00

കല്ലട, കല്ലടമുട്ടി, കരട്ടി, അണ്ടികള്ളി, കരിപ്പിടി, എന്നൊക്കെ അറിയപ്പെടുന്ന Anabas Testudineus/Anabas oligolepis (Climbing perch ) ആകട്ടെ ഇന്നത്തെ മീന്‍. ഈ ഒരു മീനിന് ഒരുപാട് പ്രാദേശിക പേരുകളും അതിനെ ചുറ്റിപറ്റി ഒരുപാട് കഥകളും കേള്‍ക്കാറുണ്ട്. അതില്‍ ഒരു കഥ എന്റെ ഒരു പോസ്റ്റില്‍ കാപ്പിലാന്‍ പറഞ്ഞിരിന്നു. (സാന്ദര്‍ഭികമായി പറയട്ടെ, ആ പോസ്റ്റാണ് ഈ ബ്ലോഗ് തുടങ്ങാനുണ്ടായ കാരണം). ഇവന്റെ പേരു 'കരട്ടി'/കൈതമുള്ളന്‍ എന്നാണെന്ന് കാപ്പിലാനും 'കരിപ്പിടി' എന്നാണെന്ന് കുറുമാനും, 'കല്ലേരീ' എന്നാണെന്ന് തോന്ന്യാസിയും 'കല്ലുരുട്ടി' എന്നാണെന്ന് കുഞ്ഞനും 'ചോവനെ കൊല്ലി' എന്നാണെന്ന് നവരുചിയനും ആ പോസ്റ്റിന്റെ കമന്റില്‍ പറഞ്ഞിരുന്നു.

പ്രാദേശിക നാമങ്ങള്‍ : കല്ലട, കല്ലടമുട്ടി, കരട്ടി, കൈതമുള്ളന്‍, അണ്ടികള്ളി, കരിപ്പിടി, കല്ലേരീ, കല്ലുരുട്ടി,ചോവനെ കൊല്ലി

ഏത് വിപരീത സാഹചര്യങ്ങളിലും ജീവിക്കുന്ന ഈ മീന്‍ മണിക്കൂറുകളോളം കരയിലും ജീവിക്കും. ഈര്‍‍പ്പമുള്ള സാഹചര്യങ്ങളില്‍ Accessory air-breathing organ (accessory respiratory organ) ഉപയോഗിച്ച് ഇവയ്ക്ക് അന്തരിക്ഷത്തില്‍ നിന്ന് തന്നെ ജീവവായു വലിച്ചെടുക്കാന്‍ കഴിയും. കുറച്ച് വെള്ളം കിട്ടിയാല്‍ ഒരാഴ്ച്കയെങ്കിലും ഇവ ജീവിക്കും. അതുകൊണ്ട് തന്നെ വെള്ളം വറ്റാറായ കുളങ്ങളില്‍ പോലും ചെളിക്കടിയില്‍ ഇവയെ ജീവനോടെ കാണാന്‍ സാധിക്കുന്നു.

മുകളില്‍ കാണുന്നത് ആണ്, താഴെയുള്ളത് പെണ്ണ്.

ഏഷ്യന്‍ വന്‍‌കരയില്‍ കണ്ടു വരുന്ന ഒരു മീനാണ് ഇവനെങ്കിലും മറ്റു സ്ഥലങ്ങളിലും ഇപ്പോള്‍ ഇവയെ കാണപ്പെടുന്നുണ്ട്. വളര്‍ത്തുമീനായി പലയിങ്ങളിലും ഇവന്‍ എത്തിപ്പെട്ടതാണെന്ന് കരുതുന്നു. ഇളം പച്ച നിറമാണ് കുഞ്ഞുങ്ങള്‍ക്കെങ്കിലും വളര്‍ന്നു വരുമ്പോള്‍ കടുപ്പമുള്ള ചാണകപ്പച്ച നിറമാണ് ഇവയ്ക്ക് സാധാരണ കാണുന്നത്. തെളിഞ്ഞ വെള്ളത്തിലും അക്വേറിയങ്ങളിലും ജീവിക്കുന്നവയ്ക്ക് ഇളം നിറം തന്നെ കാണപ്പെടുന്നുണ്ട്. കട്ടിയുള്ള ചെതുമ്പലുകളോടു കൂടിയ ദേഹത്തിന്റെ മുകള്‍ ഭാഗത്തും താഴെയും നിറയെ കൂര്‍ത്ത മുള്ളുകള്‍ കാണപ്പെടുന്നു.

ജലത്തിലെ പായലുകള്‍ക്കിടയില്‍ കഴിയുന്ന ചെറിയ മീന്‍

ജൈവ അവശിഷ്ടങ്ങള്‍ മുതല്‍ ചെറിയ മീനുകള്‍, മറ്റു ജല ജീവികള്‍ തുടങ്ങിയവ ഒക്കെ ഇവ ആഹാരമാക്കും. ഞങ്ങളുടെ നാട്ടില്‍ ചില കിണറുകളില്‍ ഇവയെ ഇട്ടിരുന്നു. കിണറ്റില്‍ വീഴുന്ന ചെറിയ ജീവികളെ ഇവ തിന്നുകൊള്ളുമല്ലോ.

അതുപോലെ മറ്റൊരു പ്രത്യേകതയാണ് പുല്ലില്‍ കൂടിയും മറ്റും ഇഴഞ്ഞ് നീങ്ങാനുള്ള കഴിവ്. വെള്ളം തേടി ഇവ മീറ്ററുകളോളം കരയില്‍ കൂടി തെന്നി തെന്നി പോകും.

ഇവയുടെ മാംസം അത്ര രുചികരമെന്ന് പറയാനാവില്ലെങ്കിലും ഉറപ്പുള്ളതു കൊണ്ട് വറുക്കാന്‍ നല്ലതാണ്.

കണ്ണി /പാലാംകണ്ണി (Megalops cyprinoides )

2009-05-04T22:09:00.008+04:00

കണ്ണി എന്ന് ഞങ്ങള്‍ കോട്ടയത്ത് വിളിക്കുന്ന Megalops cyprinoides (Indo-Pacific tarpon) കൂഞ, പാലാംകണ്ണി, നച്ചില്‍, വെളത്താന്‍ എന്നീ പേരുകളില്‍ അറിയപ്പെടുന്നു. ഇവയില്‍ ആണ്‍ മത്സ്യങ്ങള്‍ പൊതുവേ അഴിമുഖങ്ങളിലും സമുദ്രതീരത്തും ജീവിക്കുന്നു. പെണ്‍ മീനുകള്‍ കായലുകളിലും കണ്ടല്‍ക്കാടുകളിലും കണ്ടു വരുന്നു. പുതുമഴ പെയ്ത് വെള്ളം കായലിലും അഴിമുഖത്തുമെത്തുമ്പോള്‍ ഇവ കൂട്ട കൂട്ടമായി നദികളില്‍ എത്തുന്നു. അപ്പോഴാണ് ഞങ്ങള്‍ക്ക് ഇവനെ കിട്ടിയിരുന്നത്.

നല്ല വെള്ളി നിറത്തില്‍ തിളങ്ങുന്ന ചെതുമ്പലോട് കൂടിയ ഇവ ചെറിയ വെള്ളച്ചാട്ടങ്ങളില്‍ കൂടി തെന്നി തെറിച്ച് ഒഴുക്കിനെതിരെ പോകുന്നത് കാണാന്‍ തന്നെ എന്ത് ഭംഗിയാണെന്നോ ! മാംസത്തില്‍ മുഴുവന്‍ മുള്ളുകളാണെങ്കിലും വറുക്കാന്‍ ഇവന്‍ ബെസ്റ്റ്.

ഇവയും പുല്ലന്‍ എന്നു വിളിക്കുന്ന (കണമ്പ് പോലെയുള്ള ഒരു മീന്‍) മീനുമാണ് പുതുവെള്ളത്തിന് കോട്ടയം ഏരിയയില്‍ സാധാരണ കിട്ടുന്ന മീനുകളില്‍ പ്രധാനപ്പെട്ട രണ്ടിനങ്ങള്‍. മറ്റിനങ്ങളെ പറ്റി പല പോസ്റ്റുകളിലും പറഞ്ഞിട്ടുണ്ട്.

Swim Bladder-ല്‍ (ഒരു പക്ഷേ പരലിന്റെ വയറ്റില്‍ ഇത് നിങ്ങള്‍ കണ്ടിട്ടുണ്ടാവും) വായു നിറച്ച് വച്ച് അതില്‍ നിന്നും ഓക്സിജന്‍ വലിച്ചെടുക്കാനുള്ള കഴിവ് കണ്ണികള്‍ക്കുണ്ട്.

പൊതുവെ ചെറിയ ഇനം മത്സ്യങ്ങളെയാണ് ഇവ ആഹരിക്കുന്നത്. ഒന്നര മീറ്റര്‍ വരെ വലുതാകാറുണ്ട് എന്ന് ഫിഷ്‌ബേസില്‍ പറയുന്നുണ്ടെങ്കിലും ഒരടിയില്‍ കൂടുതല്‍ നീളമുള്ളതിനെ ഞാന്‍ കണ്ടിട്ടില്ല എന്നതാണ് വാസ്തവം. കാരണം ശുദ്ധജലത്തില്‍ വളരുന്നവ രണ്ടടി വരയേ വളരാറുള്ളൂ. പതിനെട്ട് കിലോ തൂക്കം വരും എന്ന് പറയുന്നെങ്കിലും ഒരു കിലോയില്‍ കൂടിയതിനേയും ഞാന്‍ കണ്ടിട്ടില്ല. കടലില്‍ ജീവിക്കുന്നവയാണ് വലിയ ഇനം. മറുരാജ്യങ്ങളില്‍ കാണുന്നയിനത്തിന് വലുപ്പവും തൂക്കവും കൂടുമായിരിക്കും.

::::::::: x:::::::::::::::::::::::::::::: x ::::::::::::::::::::::::::::: x :::::::::

ഇനി, ഇവന്റെ വലിയൊരിനം അറ്റ്ലാന്റിക്‍ ഭാഗത്ത് കടലില്‍ കാണപ്പെടുന്നു. Megalops atlanticus (Atlantic tarpon) എന്നാണ് ഇവയുടെ പേര്. രണ്ടര മീറ്റര്‍ നീളവും നൂറ്റമ്പത് കിലോ ഭാരവും ഇതിനുണ്ടാകാറുണ്ട്. അമേരിക്കയിലുള്ളവര്‍ക്ക് ഒരു പക്ഷേ അറിയാമായിരിക്കും, ഇവയെ പിടിക്കുന്നതും സൂക്ഷിക്കുന്നതിനും നിയന്ത്രണങ്ങള്‍ ഉണ്ട്. പിടിച്ചിട്ട് തിരികെ വിടുകയാണ് പതിവ്. "കൊമ്പനെ" പിടിക്കുന്നതിന് തുല്യമായ ത്രില്‍ ആണ് ഇവയെ പിടിക്കുന്നതിനു ആള്‍ക്കാരെ പ്രേരിപ്പിക്കുന്നത്.

വറ്റ അഥവാ Caranx sexfasciatus

2009-03-15T22:31:00.006+04:00

വറ്റ

കേരളത്തില്‍ സാധാരണ കറിക്ക് ഉപയോഗിക്കുന്ന ഒരു കടല്‍ മത്സ്യമാണ് വറ്റ അഥവാ Caranx sexfasciatus (Bigeye trevally). 120cm നീളവും 18Kg വരെ തൂക്കവും വരുന്ന മത്സ്യമാണ് വറ്റ. എങ്കിലും മാര്‍ക്കറ്റില്‍ കിട്ടുന്നവ സാധാരണയായി 2-8Kg വരെയുള്ളവയാണെന്ന് തോന്നുന്നു. മറ്റൊരു ഇനമാണ് Caranx melampygus (Bluefin trevally).

കഴിഞ്ഞയാഴ്ച വാങ്ങിയ രണ്ടര കിലോയുള്ള വറ്റ

Caranx sexfasciatus (Bigeye trevally)

Family: Carangidae (Jacks and pompanos)

FishBase name: Bigeye trevally

Max. size: 120 cm TL (male/unsexed; (Ref. 9987));

max. published weight: 18.0 kg

വെളുത്ത കളറോട് കൂടിയ തൊലിയാണ് വറ്റയുടേത്. ചെറിയ ചെതുമ്പലുകള്‍ ദേഹം മുഴുവന്‍ കാണപ്പെടുന്നു. ചെതുമ്പലുകള്‍ വൃത്തിയാക്കിയോ, തൊലി പൊളിച്ചു കഴിഞ്ഞോ വറ്റ വൃത്തിയാക്കാം. നല്ല കുടമ്പുളി ഇട്ട് മുളകും കൂട്ടി കറിവച്ച് ഒരു ദിവസം ചട്ടിയില്‍ തന്നെ വച്ചിട്ട് എടുത്ത് കൂട്ടി നോക്കൂ..ആഹാ... വറ്റക്കറി വളരെ രുചുയുള്ളതാണ്. ചെറിയ കഷണങ്ങളാക്കി മുറിച്ചാല്‍ വറക്കാനും കൊള്ളാം.

കേരളത്തില്‍ തന്നെ പല പേരുകളില്‍ ആണിവ അറിയപ്പെടുന്നതെന്ന് തോന്നുന്നു. പ്രാദേശിക നാമങ്ങള്‍ പലതാകാം. അവരവരുടെ നാട്ടില്‍ പറയുന്നത് എന്തെന്ന് അറിയാവുന്നവര്‍ പറഞ്ഞു തരണം എന്ന് അഭ്യര്‍ത്ഥിക്കുന്നു.

പ്രാദേശിക നാമങ്ങള്‍ : വറ്റ, കടുങ്ങാപ്പാറ, കുളുവേല്, ഓയ്പാര, മടുതള

കടലിനടിയില്‍ ഇവ കൂട്ടം കൂട്ടമായി കാണപ്പെടുന്നു.

വറ്റയുടെ കുടുംബത്തില്‍ പെട്ടതെങ്കിലും നമ്മുടെ നാട്ടില്‍ കാണാത്ത ഒരിനമാണ് മെക്സിക്കന്‍ തീരങ്ങളിലും പസഫിക്‍ തീരങ്ങളിലും കാണപ്പെടുന്ന 40Kgവരെ തൂക്കം വരുന്ന Caranx melampygus (Bluefin trevally) എന്നയിനവും ആഫ്രിക്കന്‍ തീരങ്ങളിലും അമേരിക്കന്‍ തീരങ്ങളിലും കാണപ്പെടുന്ന Caranx hippos എന്നയിനവും.

Caranx hippos

Family:Carangidae

FishBase name:

Crevalle jack

Max. size: 124 cm

max. published weight: 32.0 kg

ഈ ഇനങ്ങളുടെ മാംസം ഭക്ഷിച്ചാല്‍ Ciguatera എന്ന രോഗാവസ്ഥ വരാം എന്ന് പറയപ്പെടുന്നു. ഇതിനെ കുറിച്ച് കൂടുതല്‍ പറയാന്‍ എനിക്കറിയില്ല. തല്‍ക്കാലം ഒരു ലിങ്ക് തരാം. അതില്‍ കുറെ കാര്യങ്ങള്‍ പറഞ്ഞിട്ടുണ്ട്. വായിച്ചു നോക്കൂ.

ഈ സായിപ്പിനെ എനിക്കറിയില്ല... ഫോട്ടൊയ്ക്ക് നന്ദി അറിയിക്കുന്നു.

മൊരശ് (Hyporhamphus balinensis)

2009-03-05T22:41:00.006+04:00

കോലാനോട് സാമ്യമുള്ള മറ്റൊരു മീനാണ് മുരശ് (Hyporhamphus balinensis). മൊരശ് എന്ന് നാട്ടുഭാഷയില്‍ പറയും. ചിലയിടങ്ങളില്‍ ഊള എന്നും ഓള എന്നും പറയുമെന്നു തോന്നുന്നു. കോലാനില്‍ നിന്ന് ഇതിനുള്ള പ്രധാന വ്യത്യാസം മേല്‍ ചുണ്ടിന് നീളമില്ല എന്നതാണ്. അതുപോലെ മൂര്‍ച്ചയുള്ള പല്ലുകളും ഇല്ല. ശരീരത്തിന്റെ മുകള്‍ ഭാഗത്ത് പച്ച കല്ര്ന്ന കറുപ്പ് നിറത്തോടു കൂടിയ ചെതുമ്പലുകള്‍ കാണാം.

കേരളത്തില്‍ കാണപ്പെടുന്ന ചിലയിനം മൊരശിന്റെ നീണ്ട ചുണ്ടിന്റെ അറ്റത്ത് ചുവന്ന കളറില്‍ ഒരു പൊട്ടു കാണാം. കോലാന്‍ കൂട്ടത്തിന്റെ കൂടെ ഇവയെയും കാണാന്‍ സാധിക്കും. കോലാനെക്കാള്‍ ഇത്തിരി കൂടി ഉരുണ്ട ശരീരമാണ് മൊരശിന്റേത്.
ഇതും വറക്കുന്നതിനും പീര വയ്ക്കുന്നതിനും വളരെ നല്ലതാണ്. ഇവയ്ക്ക് 20cm നീളം വരെ കാണപ്പെടുന്നു. കടലിലും മൊറശിന്റെ വര്‍ഗ്ഗക്കാരെ കാണാം. ഇവയെ പറ്റി പിന്നീട് പറയാം.

പ്രാദേശിക നാമങ്ങള്‍ : മുരശ്, ഊള,ഓള

Hyporhamphus balinensis

Family: Hemiramphidae (Halfbeaks),

subfamily: Hemiramphinae

name: Balinese garfish

Max. size: 16.5 cm SL

Zenarchopterus dispar
Family: Hemiramphidae (Halfbeaks),

subfamily: Zenarchopterinae

Order: Beloniformes (needle fishes)

name: Feathered river-garfish

Max. size: 19.0 cm TL

കോല (Freshwater garfish)

2009-03-02T21:52:00.005+04:00

കോല /കോലാന്‍

നമ്മുടെ എല്ലാ ജലാശയങ്ങളിലും കാണാവുന്ന ഒരു മീനാണ് കോല (Freshwater garfish/Xenentodon cancila)എന്ന മീന്‍. നീണ്ട ചുണ്ടുകളോട് കൂടിയ ഇവ വെള്ളത്തിന്റെ ഉപരിതലത്തില് കൂടി ഒറ്റക്കും കൂട്ടമായും നടക്കുന്നത് കാണാം. ചുണ്ടുകള്‍ക്കുള്ളില്‍ നിറയെ പല്ലുകള്‍ കാണാം. വിരലില്‍ ഒരു നല്ല മുറിവ് വരുത്താന്‍ തക്ക ബലമുള്ള പല്ലാണ് ഇവയുടേത്.
ഒഴുക്കിനെതിരെ നീന്തി നടക്കുന്ന ഇവ ചെറിയ മീനുകളുടെ കൂട്ടത്തിലേക്ക് ഒരു പാച്ചില് നടത്തി നീണ്ട ചുണ്ടില്‍ ഒരു മീനുമായി ഓടിപ്പോകുന്നത് കാണാം. കൊക്ക് മീനെ പിടിച്ചു കൊണ്ടുപോകുന്നപോലെ. കോലയെ പിടിക്കാന്‍ പൊടിവല എന്നു (ഞങ്ങള്) പറയുന്ന ചെറിയ കണ്ണികള്‍ ഉള്ള വലകള്‍ ആണ് ഉപയോഗിക്കുന്നത്. ചെറുതല്ലെങ്കില്‍ കോല വലയുടെ കണ്ണിയില്‍ കൂടി രക്ഷപെട്ടുപോകും.
കോലയെ പിടിക്കാന്‍ ഉപയോഗിക്കുന്ന മറ്റൊരു മാര്ഗമാണ് 'കോലാക്കമ്പി'. ഇത് അതിഭയങ്കരമായ സങ്കേതം ഒന്നുമല്ല. നീണ്ടു വണ്ണം കുറഞ്ഞ ഒരു കമ്പി. ഒരു മൂന്നടിയെങ്കിലും വരും. വെള്ളത്തിന്റെ മുകളീല്‍ രണ്ട് മൂന്നിഞ്ച് താഴെ നില്ക്കുന്ന വലിയ കോലയുടെ മുതുകു നോക്കി ഒരൊറ്റയടി. അത്രയേ ഉള്ളു. ഭാഗ്യമുണ്ടെങ്കില്‍ കിട്ടും.

കോലായുടെ മുകള്‍ഭാഗത്തിന് പച്ചകലര്‍ന്ന കറുപ്പുനിറവും താഴെ ഭാഗത്തിന് വെള്ളി നിറവും ആണ്. മുകള്‍ഭാഗത്ത് ചെറിയ ചെതുമ്പലുകള്‍ ഉണ്ട്. ഏകദേശം ഒരടി വരെ നീളമുള്ള കോല നമ്മുടെ നാട്ടില്‍ കണ്ടിട്ടുണ്ട്. നാല്പത് സെന്റിമീറ്റര്‍ വരെ നീളം കാണും എന്ന് fishbase പറയുന്നു.

ഇത്തിരി വലിയ കോല ചാറുകറിക്കും വറക്കുവാനും, ചെറിയവ പീരക്കും നല്ലതാണ്.

കോല പലവിധം ഉണ്ട്. കടലില്‍ കാണുന്ന കോല ഉണ്ട്. അതിനെ പറ്റി വേറെ പോസ്റ്റില്‍ പറയാം.
Species name: Xenentodon cancila

Common Names: Freshwater garfish

Family: Belonidae (Needlefishes)

Order: Beloniformes (needle fishes)

പൂഞ്ഞാന്‍ / മാനത്തുകണ്ണി

2009-02-15T22:10:00.009+04:00

പൂഞ്ഞാന്‍

ഇപ്രവശ്യവും ഒരു ചെറിയ മീനാണ് താരം. Aplocheilus blockii ,Aplocheilus lineatus, Aplocheilus panchax ഇതെല്ലാമാണ് ഇവന്റെ നാമങ്ങള്‍. മലയാളത്തില്‍ സാധാരണയായി പൂഞ്ഞാന്‍ എന്നും മാനത്തുകണ്ണി എന്നും ചൂട്ടന്‍ എന്നും വരയന്‍ പൂഞ്ഞാന്‍ എന്നും ഒക്കെ അറിയപ്പെടുന്ന ഇവനെ പാലായിലും കോട്ടയത്തിന്റെ ചിലയിടങ്ങളിലും പറയുന്നത് നെറ്റിയില്‍ പൊട്ടന്‍ എന്നാണ്.

പൂഞ്ഞാന്‍ / മാനത്തുകണ്ണി . 'ഇവനെ കണ്ടിട്ടില്ല' എന്നാരും പറയില്ല എന്നു കരുതുന്നു.

Aplocheilus lineatus Gold

കേരളത്തിലെ ഒരു വിധപ്പെട്ട എല്ലാ സ്ഥലങ്ങളിലും കാണപ്പെടുന്ന ഒരു മീനാണ് പൂഞ്ഞാന്‍. ആറേഴ് സെന്റിമീറ്റര്‍ നീളം വരുന്ന, ചെറുതോടിന്റെയൊക്കെ തീരത്തോടടുത്ത് കാണപ്പെടുന്ന ഇവനെ പല തരത്തിലും നിറത്തിലും കാണാം.

നമ്മുടെ നാട്ടില്‍ സാധാരണ കാണുന്ന പൂഞ്ഞാനാണ് ഇവന്‍

വെള്ളത്തില്‍ കാണുന്ന സൂക്ഷ്മജീവികളും ജൈവാശങ്ങളും ഒക്കെയാണ് പ്രധാന ഭക്ഷണം. അതു കൊണ്ട് തന്നെ കൊതുകുകളെ നശിപ്പിക്കുന്നതില്‍ ഇവയും നല്ലൊരു പങ്ക് വഹിക്കുന്നുണ്ട്.

പ്രാദേശിക നാമങ്ങള്‍ : പൂഞ്ഞാന്‍ , മാനത്തുകണ്ണി , ചൂട്ടന്‍, വരയന്‍ പൂഞ്ഞാന്‍, പൂച്ചുട്ടി, നെറ്റിയില്‍ പൊട്ടന്‍ , കണ്ണാം ചൂട്ടീ

ഇവയുടെ ചിലയിനങ്ങള്‍ അക്വേറിയം ഫിഷ് ആയി ഉപയോഗിക്കുന്നുണ്ടെങ്കിലും ഇവ ശക്തി കുറഞ്ഞ മീനാണ്. അതു കൊണ്ട് തന്നെ സൂക്ഷിച്ച് കൈകാര്യം ചെയ്തില്ലെങ്കില്‍ പെട്ടെന്ന് ചത്തുപോകും.

അക്വേറിയത്തില്‍ കാണപ്പെടുന്ന പൂഞ്ഞാന്റെ വര്‍ഗ്ഗങ്ങളില്‍ ചിലതാണ് താഴെ കാണുന്നവ.

വരയന്‍ പൂഞ്ഞാന്‍

Orangetail killifish

Hechtling

വിവിധയിനങ്ങളുടെ സംഗ്രഹം

Aplocheilus blockii -Green panchax

Aplocheilus lineatus - Striped panchax

Aplocheilus panchax -Blue panchax

Family: Aplocheilidae (Killifishes)

Order: Cyprinodontiformes (rivulines, killifishes and live bearers)

Class: Actinopterygii (ray-finned fishes)

കാണപ്പെടുന്ന സ്ഥലങ്ങള്‍ :Pakistan, India, Bangladesh, Myanmar and the Indo-Malaysian archipelago,Nepal Cambodia, Vietnam, Sri Lanka etc.

courtesy : fishbase

കരിങ്കണ, ഈ ചെറിയവനെ അറിയുമോ?

2009-01-30T21:57:00.007+04:00

കരിങ്കണ

ഇന്ന് ഒരു ചെറിയ മീനിനെ പരിചയപ്പെടാം. പേര് "കരിങ്കണ". ഇംഗ്ലീഷ് പേര് Pseudosphromenus cupanus, macropodus cupanus . (ഇത് കാണൂ). ഈ മീനിനെ പൊതുവേ ഒരു അക്വേറിയം ഫിഷ് ആയിട്ടാണ് കണക്കാക്കുന്നത്. പക്ഷേ കോട്ടയം, ആലപ്പുഴ ജില്ലകളിലെ പാടങ്ങള്‍ക്കിടയിലെ ചെറിയ കൈത്തോടുകളില്‍ കിടക്കുന്ന ഓരോ ഇലയുടെ അടിയിലും കാണും ഓരോ കരിങ്കണ. കേരളത്തിലെ ഓരോ ചെറിയ അരുവികളിലും തോടുകളിലും ഇവ കാണും എന്ന് തോന്നുന്നു .

പൊതുവേ കാണപ്പെടുന്നവയ്ക്ക് മൂന്ന്-നാല് സെന്റിമീറ്റര്‍ വലിപ്പമാണുള്ളത്. മാക്സിമം അഞ്ച്-ആറ് സെന്റിമീറ്റര്‍ നീളം മാത്രമേ ഇവയ്ക്കുള്ളൂ.

ഇവയെ പിടിച്ച് ചൂണ്ടയില്‍ കൊരുക്കാന്‍ ഇരയായും, വീട്ടുമുറ്റത്തെ ടാങ്കില്‍ കിടക്കുന്ന വരാലിന് ഭക്ഷണമായും ഒക്കെ കൊടുത്തിട്ടുണ്ട്.

പണ്ടൊക്കെ ഇവയിലെ നല്ല കളര്‍ ഉള്ളവയെ പിടിച്ച് കുപ്പിയിലിട്ട് മേശപ്പുറത്ത് വച്ചിട്ടുണ്ട്. പല തരത്തിലുള്ള കരിങ്കണകള്‍ നമ്മുടെ നാട്ടില്‍ കാണപ്പെടുന്നുണ്ട്. വാലു നീണ്ടതും ചുവന്ന കളറില്‍ ഉള്ളതും ഒക്കെയുണ്ട്.

നമ്മുടെ നാട്ടില്‍ പൊതുവേ കാണപ്പെടുന്ന മറ്റൊരിനം കരിങ്കണയാണ് Pseudosphromenus dayi. നീണ്ട വാലുകള്‍ ഉള്ള ഇവയെ കാണാന്‍ ഇത്തിരി ഭംഗി കൂടുതല്‍ ഉണ്ട്.

വിവരങ്ങള്‍ക്ക് കടപ്പാട് : Informatie Gids

തിലോപ്പിയ (Oreochromis mossambicus)

2009-01-25T22:22:00.004+04:00

തിലോപ്പിയ

Cichlids കുടുംബത്തില്‍ പെട്ട ആഫ്രിക്കക്കാരനായ തിലോപ്പിയ, അഥവാ Mozambique Mouthbrooder, (Oreochromis mossambicus) ലോകത്തിലെ ഒരുവിധപ്പെട്ട എല്ലാ സ്ഥലങ്ങളിലും ധാരാളമായി കാണുന്ന ഒരു മീനാണ്. പ്രത്യേകിച്ച് നമ്മുടെ ഡാമുകളിലും ജലാശയങ്ങളിലും. പക്ഷേ ഇവ പണ്ടൊക്കെ ഞങ്ങളുടെ നാടായ കോട്ടയത്തും പരിസരങ്ങളിലും വളരെ കുറവായിരുന്നു. പക്ഷേ മത്സ്യകൃഷി തുടങ്ങിയതോടെ പലയിടത്തും ഇവ കാണപ്പെടുന്നുണ്ട്.

തിലാപ്പിയ, തിലോപ്പി എന്നൊക്കെ പറയുന്ന ഇവനെ സിലോപ്പി എന്നു വരെ പറയുന്നവര്‍ ഉണ്ട്. ചെളിവെള്ളമാണെങ്കിലും ഒഴുക്കില്ലാതെ കെട്ടിക്കിടക്കുന്ന വെള്ളമാണെങ്കിലും മലിനജലമാണെങ്കിലും ഇവയ്ക്ക് ഒരു പ്രശ്നവുമില്ല. ഒരു കുഴപ്പവുമില്ലാതെ അവ ജീവിക്കും. മലിനജലത്തില്‍ജീവിക്കുന്നതു കൊണ്ടു തന്നെ ഇവയെ നമ്മുടെ നാട്ടില്‍ പലരും കറിക്ക് ഉപയോഗിക്കില്ലായിരുന്നു. (ഉദാഹരണത്തിന് കൊച്ചിയിലെ മലിനജലം ഒഴുകുന്ന ഓടകളില്‍ എല്ലാം ഇവയെ ധാരാളം കാണാമായിരുന്നു, കൊതുകു നിവാരണത്തിന് ഇവന്‍ കുറെയൊക്കെ സഹായിക്കുന്നുണ്ട്).

ഒരടി വരെ വലുതാകുന്ന തിലോപ്പിയക്ക് ഭാരം ഒരു കിലോയില്‍ കൂടുതല്‍ വരെ കാണപ്പെടുന്നു. ഇവ പല നിറത്തിലും തരത്തിലും കാണപ്പെടുന്നുണ്ട്.

അതുപോലെ ലോകത്തിലെ മീനുകളില്‍ ഏറ്റവും പെട്ടെന്ന് പെരുകുന്ന ഒരിനമാണ് തിലോപ്പിയ. ആണ്‍മത്സ്യം തയ്യാറാക്കുന്ന ഇടങ്ങളില്‍ മുട്ടയിടുന്ന പെണ്‍‌മത്സ്യങ്ങള്‍ കുറച്ച് ദിവസങ്ങള്‍ക്ക് ശേഷം മുട്ടകള്‍ തന്റെ വായില്‍ സൂക്ഷിക്കുകയും വിരിയുന്ന കുഞ്ഞുങ്ങളെ വീണ്ടും കുറച്ച് ദിവസങ്ങള്‍ വായിലും ചെകിളകള്‍ക്കിടയിലും സൂക്ഷിക്കുകയും ചെയ്യുന്നു. ഒരു തവണ മുപ്പത് നാല്പത് കുഞ്ഞുങ്ങള്‍ വരെ ഉണ്ടാകാറുണ്ട്. ഇവയെ ശല്യക്കാരായ മത്സ്യങ്ങളുടെ (Invasive species) ഗണത്തില്‍ പെടുത്താന്‍ ഈ പെരുകല്‍ കാരണമാക്കുന്നു. ഇവ നിറയുന്ന ജലാശയങ്ങളില്‍ മറ്റു മത്സ്യങ്ങളുടെ ജീവനത്തെ തന്നെ ഇവ ബുദ്ധിമുട്ടിലാക്കുന്നു.

ഇനി രുചിയെപറ്റി പറഞ്ഞാല്‍ അത്ര രുചിയുള്ള മീനാണ് തിലോപ്പിയ എന്നെനിക്ക് തോന്നിയിട്ടില്ല. വറുത്താല്‍ കുഴപ്പമില്ല എന്ന് മാത്രം.

Spotted thilapia എന്നത് ഇവയിലെ ഒരിനമാണ്.

അല്‍-ഐനിലെ തടാകത്തിലെ തിലോപ്പിയകള്‍

Courtesy : Fishbase database

pictures : own & diff websites

ആരോന്‍, പനയാരോന്‍ (Mastacembelidae family)

2008-12-31T12:02:00.006+04:00

ആരോന്‍

Mastacembelidae (spiny eels) കുടുംബത്തില്‍ പെട്ടതും Macrognathus guentheri (Malabar spinyeel), Macrognathus keithi എന്നീ പേരുകളില്‍ നമ്മുടെ നാട്ടില്‍ അറിയപ്പെടുന്നതുമായ ആരോന്‍ അല്ലെങ്കില്‍ ആരകന്‍ 25-30 സെന്റിമീറ്റര്‍ വരെ വളരുന്ന ഒരു മത്സ്യമാണ്. വെള്ളത്തിന്റെ അടിഭാഗത്തുകൂടി നടക്കുവാന്‍ ഇഷ്ടപ്പെടുന്ന ഇവ ഒഴുക്കുവെള്ളത്തിലും കാണപ്പെടുന്നു.

Macrognathus aaral

Macrognathus aral (One-stripe spiny eel) എന്നയിനത്തിന് അറുപത് സെന്റിമീറ്റര്‍ വരെ നീളം കാണും. നമ്മുടെ ജലാശയങ്ങളില്‍ ഇവയുടെ എണ്ണം വളരെ കുറവാണ്. ശരീരത്തുള്ള ഡിസൈന്‍ ആണ് ഇവയുടെ പ്രത്യേകത.

പനയാരോന്‍

Tire track eel (Mastacembelus armatus) അഥവാ 'പനയാരോന്‍' എന്നയൊരിനം ഉണ്ടെങ്കിലും നമ്മുടെ നാട്ടില്‍ ഇവ അപൂര്‍‌വ്വം ആണെന്ന് തോന്നുന്നു. എങ്കിലും ചിലപ്പോഴൊക്കെ ഇവനെ വലയില്‍ കിട്ടിയിരുന്നു. ഇവയുടെ ദേഹത്ത് വട്ടത്തിലുള്ള ഡിസൈന്‍ ആണുള്ളത്. മലേഷ്യന്‍ തടാകങ്ങളില്‍ കാണപ്പെടുന്ന ഇവയ്ക് തൊണ്ണൂറ് സെന്റിമീറ്റര്‍ വരെ നീളം കാണും എന്ന് വിക്കിയില്‍ ഇവിടെ പറയുന്നു.

Macrognathus keithi

എണ്‍‍പതുകളുടെ അവസാനവും തൊണ്ണൂറുകളുടെ ആദ്യവും നമ്മുടെ നാട്ടില്‍ പടര്‍ന്ന വൈറസ് ബാധിച്ച് കുറെയൊക്കെ നശിച്ച ഒരു മത്സ്യമാണ് ആരോന്‍. (വരാല്‍, കരിമീന്‍, പരല്‍, ഇവയൊക്കെ അന്ന് സാരമായി അസുഖം ബാധിച്ച ഇനങ്ങളാണ്).

തൊട്ടാല്‍ ‍വഴുവഴുപ്പുള്ള ഇവയുടെ തൊലി ഉരിച്ചെടുക്കാന്‍ സാധിക്കും. വയറിന്റെ അടിഭാഗത്തായി വെളിയിലേക്ക് വളഞ്ഞ കട്ടിയുള്ള ഒരു മുള്ള് കാണപ്പെടുന്നു. നല്ല ഉറപ്പുള്ള മാസം ഉള്ള ആരോന്‍ വറുക്കാന്‍ അത്യുത്തമം. കറിക്കാണെങ്കിലും നല്ലത്.

ശരീരഘടനയിലുള്ള ചെറിയ വ്യത്യാസങ്ങള്‍ കൊണ്ട് വേര്‍തിരിക്കപ്പെട്ട ധാരാളം ഇനങ്ങള്‍ ആരോന്‍ ഉണ്ട്. (ഇവ തമ്മിലുള്ള വ്യത്യാസം എന്തെന്ന് ചോദിക്കല്ലേ, വ്യക്തമായി എനിക്കറിയില്ല). ഇവയുടെ ശാസ്ത്രനാമങ്ങള്‍ താഴെ കൊടുക്കുന്നു.

1. Macrognathus guentheri (Malabar spinyeel)
2. Mastacembelus vanderwaali (African Spiny Eel)
3. Macrognathus keithi
4. Macrognathus aral
5. Mastacembelus armatus
6. Macrognathus taeniagaster
7. Mastacembelus sanagali
8. Mastacembelus cryptacanthus

ഇതൊക്കെ സേര്‍ച്ച് അടിക്കുമ്പോള്‍ കിട്ടുന്ന പടങ്ങളില്‍ ചിലതൊക്കെ ഒരേ പോലെയിരിക്കുന്നു. അതായത് ചെറിയ വ്യത്യാസങ്ങള്‍ മാത്രമേ ഉള്ളൂ എന്ന് തോന്നുന്നു.

Picture Courtesy : different websites

കാരി - (Asian Stinging catfish)

2008-12-24T21:54:00.008+04:00

കേരളത്തില്‍ പൊതുവേ കണ്ടു വന്നിരുന്ന ഒരു മ‍ത്സ്യമാണ് കാരി അഥവാ Heteropneustes fossilis (Stinging catfish). "കണ്ടുവന്നിരുന്ന" എന്ന് പറയുന്നതാണ് ശരി എന്ന് തോന്നത്തക്കവിധം ഇതിന്റെ എണ്ണം കുറഞ്ഞിട്ടുണ്ട് എന്ന് പറയപ്പെടുന്നു. ചിലയിടങ്ങളില്‍ തെയിലി എന്നും കടു എന്നും ഇവ അറിയപ്പെടുന്നു.

പണ്ടൊക്കെ ഞങ്ങളുടെ നാട്ടില്‍ ആറുകളിലും തോടുകളിലും എപ്പോഴും 'മറിഞ്ഞ്' കളിച്ചിരുന്ന ഒരു മീനായിരുന്നു ഈ 'കാരി'. നോക്കി നില്‍ക്കുമ്പോള്‍ ഇവ ഓടി വന്ന് ശ്വാസം എടുത്തിട്ട് പോകുന്നത് കാണാമായിരുന്നു. പ്രത്യേകിച്ച് പാടത്തെ വെള്ളം വറ്റിക്കുന്ന സമയത്ത്.

കാരിയുടെ ശരീരം വെള്ളമയമുള്ളതും വഴുവഴുപ്പോട് കൂടിയതുമാണ്. ഇതിന് രണ്ട് മുള്ളുകള്‍ (കൊമ്പുകള്‍) ആണുള്ളത്. മുതുകത്ത് മുള്ള് ഇല്ല. ഉള്ള രണ്ട് മുള്ളുകള്‍ (കൊമ്പുകള്‍) നമ്മുടെ ശരീരത്ത് എവിടെയെങ്കിലും കയറിയാല്‍ ഭയങ്കരമായ വേദനയാണ്. ഒരു തരം മരവിപ്പും കാണും. കാരണം ഇവയ്ക്ക് വിഷം ഉണ്ട്. മുള്ള്‍ തറക്കുന്ന ഭാഗം നീരു വന്ന് വീര്‍ക്കും. ചൂടുവെള്ളം ഒഴിച്ചു കഴുകുന്നത് നല്ലതായിരിക്കും. (രഹസ്യമായി ഒരു കാര്യം കൂടി. ആറ്റുതീരത്ത് എവിടെ ചൂടുവെള്ളം, അതിനുപകരം മുള്ളുകൊള്ളുന്നയിടത്ത് മൂത്രം ഒഴിച്ചാല്‍ മതിയെന്ന് പറയുന്നവരുണ്ട്.

പൊതുവെ രണ്ടു നിറത്തിലുള്ള കാരികളെ നമ്മുടെ നാട്ടില്‍ ‍കണ്ടു വരുന്നു. ഒന്ന് നല്ല കറുത്ത നിറമുള്ളവ. രണ്ട്, ചാണകപ്പച്ച നിറം കലര്‍ന്ന കറുപ്പ് നിറത്തോട് കൂടിയത്.

പ്രാദേശിക നാമങ്ങള്‍ : കാരി, കടു, തെയിലി

തൊലി ഉരിഞ്ഞെടുത്ത് നല്ല മുളകും തേച്ച് വറുത്തടിക്കാന്‍ നല്ല മീനാണ് കാരി. കാരിയെ പറ്റി കൂടുതല്‍ ഇവിടെ കാണാം.

ചില്ലാന്‍, കൂരി (Asian Striped Catfish)

2008-12-15T21:14:00.006+04:00

ചില്ലാന്‍.. പാണന്‍ ചില്ലാന്‍ (Asian Striped Catfish). കൂരി എന്നും കല്ലന്‍ കൂരി എന്നും ഏട്ടച്ചുള്ളി എന്നും പാണ്ടന്‍ ചില്ലാന്‍ എന്നും ഒക്കെ പല സ്ഥലങ്ങളിലും അറിയപ്പെടുന്നത് ഈ ചെറിയവന്‍ തന്നെയാണ്.

Mystus vittatus

പ്രാദേശിക നാമങ്ങള്‍ :ചില്ലാന്‍, പാണന്‍ ചില്ലാന്‍, കൂരി, കല്ലന്‍ കൂരി,ഏട്ടച്ചുള്ളി, പാണ്ടന്‍ ചില്ലാന്‍

Mystus oculatus

പുതുവെള്ളത്തില്‍ വയറു നിറയെ മുട്ടകളുമായി ഇവ കൂട്ടം കൂട്ടമായി ആറുകളിലേക്ക് കയറി വരും. കല്ലുകള്‍ക്കിടയിലൂടെ കടന്നു വരുന്ന ചില്ലാന്‍ കൂട്ടം എണ്ണിയാല്‍ ഒടുങ്ങാത്തത്ര കാണും. ഇവയുടെ കൂട്ടം (നൂറും ഇരുനൂറും എണ്ണം) വലയില്‍ കുടുങ്ങിയിട്ട് വലയുമായി വീട്ടില്‍ പോയവര്‍ ഞങ്ങളുടെ നാട്ടില്‍ ധാരാളമുണ്ട്.

കാരണം ഇവയ്ക്ക് മൂന്നു കൊമ്പുകള്‍ ഉണ്ട്, ചിറകിനോട് ചേര്‍ന്ന് രണ്ടെണ്ണവും, മുതുകില്‍ ഒരെണ്ണവും. അതില്‍ ചിറകിനോട് ചേര്‍ന്നുള്ളവയ്ക്ക് അരം പോലെ മടക്കുകളും ഉണ്ട്. ഇവ രണ്ടും ഒടിച്ചാലേ ഇവയെ വലയില്‍ നിന്ന് എടുക്കാനാവൂ. ഇതൊന്നു കയ്യില്‍ തറച്ചാലോ ! പിന്നെ കയ്യും വായില്‍ വച്ച് മുകളിലേക്ക് ചാടിയാല്‍ മതി... കൈ പഴുക്കാതിരുന്നാല്‍ ഭാഗ്യം...

Mystus cavasius

നാല് -അഞ്ച് ഇഞ്ച് വരെ നീളമുള്ള ചില്ലാനെ കാണാമെങ്കിലും പൊതുവില്‍ മൂന്ന് നാല് ഇഞ്ച് ആണ് ഇവയുടെ വലുപ്പം എന്ന് തോന്നുന്നു.

Mystus castaneus

ചില്ലാന്‍ കറി വയ്ക്കാനാണ് നല്ലത്. ഇവയെ ഉണങ്ങിയും സൂക്ഷിക്കാറുണ്ട്. കൂടുതല്‍ എണ്ണം കുറഞ്ഞ സമയത്ത് കിട്ടുന്നത് തന്നെ കാരണം. നല്ലവണ്ണം ഉപ്പിട്ട് ഉണങ്ങിയാല്‍ വറക്കാന്‍ വലരെ നല്ലത്.

::::::::::::::::: x :::::::::::::::::::::::: x ::::::::::::::::::::: x ::::::::::::::::::

കാഴ്ച്ചയില്‍ ഇവനെപോലെ തോന്നുമെങ്കിലും മഞ്ഞക്കൂരി (Horabagrus brachysoma) ഇവന്റെ കുടുംബപ്പേരുകാരനല്ല.

മുതുകല, അല്ലെങ്കില്‍ മുതുകൊമ്പല (Nandus Nandus)

2008-12-04T12:10:00.005+04:00

മുതുകല, Nandus Nandus (Gangetic leaf fish)

മുതുകല, മുതുകൊമ്പല, ഉറക്കം തൂങ്ങി, അല്ലെങ്കില്‍ മുതുക്കി, എന്നൊക്കെ അറിയപ്പെടുന്ന ഇവന്‍ നമ്മുടെ നാട്ടില്‍ ഇക്കാലത്ത് വളരെ അപൂര്‍‌വ്വമായി മാത്രം കാണുന്ന ഒരിനം ആണെന്ന് എനിക്ക് തോന്നുന്നു. ഇവയെ അക്വേറിയത്തില്‍ വളര്‍ത്താനും ഉപയോഗിക്കുന്നുണ്ട്. ഏഴ് എട്ടിഞ്ച് വരെ നീളം വയ്ക്കും എന്ന് തോന്നുന്നു.
ഇവനെ പിടിച്ച് വായ ഒന്നു തുറന്നു നോക്കണം. ഇവനേക്കാള്‍ വലിയ ഒരു മീനിനെ ഉള്‍ക്കൊള്ളാന്‍ പറ്റിയ വലുപ്പത്തില്‍ വായ വികസിക്കുന്നത് കാണാം. അതായത് അടുക്കടുക്കായി ഇരിക്കുന്ന വായ പൊളിക്കുമ്പോള്‍ വളരെ വലുതായി വരും എന്ന് സാരം. ദേഹം നിറയെ കട്ടിയുള്ള ചെതുമ്പലുകള്‍ കാണുന്നു. മുതുകു ഭാഗത്ത് കട്ടിയുള്ള മുള്ളുകളും ഉണ്ട്.

വെള്ളം പൊങ്ങുന്ന സമയത്ത് ഞങ്ങളുടെ നാട്ടില്‍ കിട്ടിയിരുന്ന ഒരു മീനാണിവന്‍. Nandus Nadus, Gangetic leaf fish എന്നും ഇംഗ്ലീഷില്‍ പറയപ്പെടുന്ന ഇവന്‍ ഏഷ്യയിലാണ് പൊതുവേ കാണപ്പെടുന്നത്.

ഇത് വായിക്കുന്ന പലര്‍ക്കും ഇവന്‍ ഒരു അജ്ഞാതന്‍ ആയിരിക്കും എന്ന് തോന്നുന്നു. സാധാരണ മാര്‍ക്കറ്റില്‍ ഒന്നും കാണാത്ത മീന്‍ ആണല്ലോ. ഇവനെ കാണാത്തവര്‍ ഉണ്ടെങ്കില്‍ ഒന്നു പറഞ്ഞിട്ടു പോകണേ.. കണ്ടവരാണെങ്കിലും പറയാം.. മറ്റു പേരുകളില്‍ ഇവന്‍ അറിയപ്പെടുന്നു എങ്കില്‍ അതു കൂടി അറിയിക്കണം എന്ന് അഭ്യര്‍ത്ഥിക്കുന്നു.

വിവിധയിനം പരലുകള്‍

2008-11-17T22:08:00.018+04:00

പരലുകളെ ആര്‍ക്കും പരിചയപ്പെടുത്തേണ്ട കാര്യമില്ല എന്ന് തോന്നുന്നു. പക്ഷേ പലതരം പരലുകളെപറ്റി പറയേണ്ടിയിരിക്കുന്നു. നമ്മുടെ ആറുകളിലും തോടുകളിലും എന്നു വേണ്ട വെള്ളം ഉള്ളയിടത്തെല്ലാം വിവിധ തരത്തിലുള്ള പരലുകളെ കാണാം. എത്രയിനം പരലുകള്‍ കേരളത്തില്‍ ഉണ്ട് എന്ന്‍ എനിക്കറിയില്ല. പക്ഷേ താഴെപ്പറയുന്ന പലയിനത്തേയും ഞാന്‍ നേരിട്ട് കണ്ടിട്ടുണ്ട്.

:::::::::::::::::::::::::: x :::::::::::::::::::::::::::::::::

പരലുകള്‍

1. കേരളത്തിലെ ആറുകളില്‍ സാധാരണ കണ്ടുവരുന്ന രണ്ടിനം പരലുകള്‍ ആണ് ഉരുളന്‍ പരല്‍ /ഊളിപ്പരല്‍ (Puntius amphibius), പൂവാലിപ്പരല്‍/കൊടിച്ചി പരല്‍ (Puntius filamentosus) എന്നിവ. ഇവയില്‍ കൊടിച്ചി പരല്‍ വലുപ്പത്തില്‍ ഇത്തിരി വലുതായിരിക്കും. വാലുകളില്‍ കൊടി പോലെ കളര്‍ ഉള്ളതിനാല്‍ ആണ് ഇവയെ ഞങ്ങള്‍ കൊടിച്ചി എന്ന് പറയുന്നത്. പൂവാലി എന്നതിന് പ്രത്യേക വിവരണം വേണമെന്ന് തോന്നുന്നില്ല.

ഉരുളന്‍ പരല്‍

കൊടിച്ചി പരല്‍

:::::::::::::::::::::::::: x :::::::::::::::::::::::::::::::::

2. പരലുകളില്‍ വലിയവനാണ് കുറുവപ്പരല്‍/കുറുച്ചിപ്പരല്‍ (Puntius sarana). ഉരുണ്ട ദേഹവും ചെറിയ രണ്ടു മീശകളുമായി ഇവനെ കാണുന്നത് തന്നെ ഒരഴകാണ്. വറക്കാനാണെങ്കില്‍ ബെസ്റ്റും. നീളം ആറിഞ്ച് ഏഴിഞ്ച് വരെ കാണും.

കുറുവപ്പരല്‍

:::::::::::::::::::::::::: x :::::::::::::::::::::::::::::::::

3. കടുങ്ങാലി (Puntius ticto), കൈപ്പ (Puntius vittatus) എന്നീ വര്‍ഗ്ഗങ്ങള്‍ ആണ് പരല്‍മീനുകളില്‍ ചെറിയവന്മാര്‍. ഇതില്‍ കൈപ്പ എന്നയിനം കൂട്ടം കൂട്ടമായി നടക്കുന്നവയാണ്. ഒരിഞ്ച് ഒന്നരയിഞ്ച് വലുപ്പമുള്ള ഇവയെ "പീര" വയ്ക്കാന്‍ ഉപയോഗിക്കുന്നു. (ചുമ്മാ ചട്ടിയില്‍ ഇട്ട് ഇത്തിരി ഉപ്പുകല്ലും വാരിയിട്ട് തേച്ച് കഴുകിയെടുത്ത് തേങ്ങാപ്പീരയുമിട്ട്, കുടമ്പുളുയുമിട്ട് തോരന്‍ കറി വയ്ക്കുന്നതാണ് "മീന്‍ പീര" എന്നതു കൊണ്ട് ഉദ്ദേശിക്കുന്നത്)

കടുങ്ങാലി

കൈപ്പ

:::::::::::::::::::::::::: x :::::::::::::::::::::::::::::::::

4. കൈലി/ആടുകുണ്ട/വാഴക്കാവരയന്‍ (Puntius fasciatus/Puntius melanampyx) എന്നയിനം സാധാരണയായി തോടുകളിലും ഒഴുക്കുവെള്ളത്തിലുമാണ് കാണുന്നത് എന്ന് (എനിക്ക്) തോന്നുന്നു. ഇവയുടെ ദേഹത്തുള്ള വരകള്‍ ആണ് ഒരു പ്രത്യേകതയായി പറയാനുള്ളത്.

:::::::::::::::::::::::::: x :::::::::::::::::::::::::::::::::

5. വയനാടന്‍ പരല്‍ (Puntius mahecola), ഉണ്ടക്കണ്ണി (Puntius sophore) ഇവയും പരലിന്റെ കുടുംബക്കാര്‍ തന്നെ.

..... ഉണ്ടക്കണ്ണി ... വയനാടന്‍ പരല്‍

:::::::::::::::::::::::::: x :::::::::::::::::::::::::::::::::

6. കച്ചിപ്പരല്‍ (Puntius chola), അരുളിപ്പരല്‍/സൈലസ് പരല്‍ (Puntius arulius) എന്നിവയും നമ്മുടെ ജലാശയങ്ങളില്‍ കണ്ടുവരുന്നവയാണ്.

കച്ചിപ്പരല് ‍....... അരുളിപ്പരല്‍/സൈലസ് പരല്‍

:::::::::::::::::::::::::: x :::::::::::::::::::::::::::::::::

7. ഞങ്ങള്‍ കറിക്കുപയോഗിക്കാത്ത തുപ്പലുകൊത്തി (Rasbora daniconius) എന്നറിയപ്പെടുന്ന ഒരു തരം പരല്‍ കൂടിയുണ്ട്. ആറ്റിലോ, തോട്ടിലോ കുളത്തിലോ ഒന്ന് തുപ്പി നോക്കൂ. ഒരു മീന്‍ ഓടി വന്ന് അത് കൊത്തുന്നുവെങ്കില്‍ അത് തുപ്പലു കൊത്തി തന്നെ.

:::::::::::::::::::::::::: x :::::::::::::::::::::::::::::::::

8. ഇനിയാണ് പരലുകളില്‍ വിലയേറിയ ഇനത്തിനെ പരിചയപ്പെടാന്‍ പോകുന്നത്. പക്ഷേ ഇവന്‍(ള്‍) കറി വയ്ക്കുന്നയിനമല്ല. അക്വേറിയങ്ങള്‍ക്ക് പ്രിയപ്പെട്ടവയാണിവ, അതെ മിസ്.കേരള , അഥവാ ചെങ്കണിയാന്‍ (Puntius denisonii). (ഇവയെപ്പറ്റിയുള്ള അനോണി ആന്റണിയുടെ പോസ്റ്റ് നോക്കൂ)

മിസ്.കേരള

Courtesy : Fishbase, Parisaramahiti

Pictures : Diff Websites

അറിഞ്ഞില്‍ (Glassy Fish, Glass Fish)

2008-11-11T22:16:00.005+04:00

അറിഞ്ഞില്‍

നമ്മുടെ നദികളില്‍ സാധാരണ കണ്ടു വരുന്ന ഒരു മത്സ്യം ആണ് അറഞ്ഞില്‍ അല്ലെങ്കില്‍ അറിഞ്ഞില്‍. തെളിഞ്ഞ വെള്ളത്തിലും പുതു വെള്ളത്തിലും ഇവ ധാരാളമായി കാണുന്നു. അതുപോലെ വിശാലമായ കായലുകളിലും ഇവ കണ്ടു വരുന്നു. ശുദ്ധജലത്തിലും ചെറിയ അളവു വരെ ഉപ്പുവെള്ളത്തിലും ജീവിക്കാന്‍ കഴിവുള്ള മത്സ്യമാണ് അറഞ്ഞില്‍ എന്ന Ambassis dussumieri. ആറ്ററഞ്ഞില്‍ (Ambassis nalua) എന്നറിയപ്പെടുന്ന ഇത്തിരി വലുപ്പം കൂടിയ ഇനവും നമ്മുടെ നാട്ടില്‍ കണ്ടുവരുന്നുണ്ട്. മരൊറ്റിനം ആണ് Indian glassy fish എന്നറിയപ്പെടുന്ന Parambassis ranga.

ഇതിന്റെ പ്രാദേശിക നാമങ്ങളില്‍ ഒരു പേരാണ് നന്ദന്‍ അഥവാ നന്തന്‍. കൂട്ടം കൂട്ടമായി നടക്കാന്‍ ഇഷ്ടപ്പെടുന്ന ഒരു മത്സ്യം കൂടിയാണ് അറഞ്ഞില്‍ എന്ന് പറയാം.

Indian glassy fish എന്നറിയപ്പെടുന്ന Parambassis ranga

ചെറിയ വിഭാഗത്തില്‍ പെടുന്ന അറഞ്ഞിലിന്റെ ശരീരം ഒരു ഗ്ലാസ്സ് പോലെയാണ് അകത്തുള്ള മുള്ളുകള്‍ വരെ തെളിഞ്ഞു കാണാം. മൂന്ന് നാലിഞ്ച് നീളമേ ഇവയ്ക്ക് കാണാറുള്ളു. ആറ്ററഞ്ഞില്‍ എന്ന വിഭാഗത്തിന് നാലു മുതല്‍ അഞ്ച് ഇഞ്ചു വരെ വലുപ്പം കാണപ്പെടുന്നു.

ആറ്ററഞ്ഞില്‍

അറഞ്ഞിലിന്റെ മറ്റു വിഭാഗങ്ങള്‍ Ambassis buruensis , Ambassis natalensis, Ambassis gymnocephalus, Ambassis interrupta, Ambassis kopsii, Ambassis macracanthus, Ambassis macracanthus, Ambassis miops, തുടങ്ങിയ ശാസ്ത്രനാമത്തില്‍ അറിയപ്പെടുന്നവയാണ്.

Ambassis natalensis

ഇതില്‍ ചില ഇനങ്ങള്‍ അഴിമുഖങ്ങളിലും (കടലിലും) കാണപ്പെടുന്നവയാണ്. ഉദാ:Ambassis interrupta, Ambassis natalensis, Ambassis miops തുടങ്ങിയവ.

അഴിമുഖങ്ങളിലെ Ambassis miops കൂട്ടം

നല്ല രുചിയുള്ള മാസമാണ് ഈ മത്സ്യങ്ങള്‍ക്കുള്ളത്. വറുക്കാന്‍ ബഹുകേമം. അറഞ്ഞില്‍ നല്ലപോലെ പൊരിച്ചെടുത്താല്‍ നല്ല കറുമുറെ തിന്നമ്മ്. കറിക്കും കൊള്ളാം.

Courtesy : fishbase

കരിമീന്‍, പള്ളത്തി

2008-11-04T21:50:00.007+04:00

കരിമീന്‍ (Etroplus suratensis )

ഇന്ന് പറയാന്‍ പോകുന്നത് മീന്‍ ഇഷ്ടപ്പെടുന്ന മലയാളികള്‍ക്കും കേരളം സന്ദര്‍ശിക്കുന്ന വിദേശികളടക്കമുള്ള വിനോദ സഞ്ചാരികള്‍ക്കും പ്രിയപ്പെട്ട കരിമീന്‍ അഥവാ Pearl Spot-നെ പറ്റിയാണ്. കരിമീന്‍ അറിയാത്തവര്‍ ഉണ്ടാകും എന്ന് വിശ്വസിക്കുന്നില്ല. കരിമീന്‍ പ്രാച്ചി എന്നും ഇതിനെ പറയുന്നത് കേട്ടിട്ടുണ്ട്.

Etroplus suratensis എന്ന ശാസ്ത്രനാമത്തില്‍ അറിയപ്പെടുന്ന കരിമീന്‍ ഒരു ശുദ്ധജലമത്സ്യം ആണ്. കേരളത്തില്‍ വേമ്പനാട് കായലില്‍ ഇവ സമൃദ്ധമായി കാണുന്നു. മറ്റു കായലുകളില്‍ ഇവ ഉണ്ടെങ്കിലും ചെളി കുറവായതിനാല്‍ വേമ്പനാട്ടു കായലിലെ കരിമീന് സ്വാദ് കൂടുതലാണെന്ന് പറയുന്നു.

Genus :Etroplus Cuvier
Scientific name :Etroplus Suratensis (Bloch)
English name :Pearl-spot

സാഹയുടെ കരിമീന്‍! Etroplus Suratensis എന്ന പോസ്റ്റില്‍ നിന്നും ഒരു പടം. (ചോദിക്കാതെ എടുത്തതിന് ക്ഷമാപണം)

രണ്ട് കിലോ വരെ വലുപ്പമുള്ള കരിമീനെ കണ്ടിട്ടുണ്ട്. പക്ഷേ പൊതുവേ കണ്ടു വരുന്നത് 200-300ഗ്രാം ഉള്ളവയാണ്. അതിലും വലുതാകാന്‍ മനുഷ്യര്‍ അവയെ അനുവദിക്കുന്നില്ല. കരിമീന് പൊതുവേ കരിമ്പച്ച കളര്‍ ആണുള്ളത്. പുറത്ത് കുറുകെ എട്ട് വരകള്‍ കാണപ്പെടുന്നു. കരിമീന്റെ ചെതുമ്പല്‍ അടികൂട്ടി ചെത്തി എടുക്കുകയാണ് ചെയ്യുന്നത്. പിന്നെ നല്ല കരുമുരാ വറുത്തെടുത്താല്‍ !!!

********* ********** **********

പള്ളത്തി (Etroplus Maculatus)

ഇനി ഇവന്റെ വംശത്തില്‍ പെട്ട ഒരു ചെറിയ ഇനത്തിനെ പരിചയപ്പെടാം. പള്ളത്തി എന്ന് ഞങ്ങള്‍ പറയുന്ന Etroplus Maculatus. ഇവയ്ക്ക് കരിമീന്റെ ഷേപ്പ് മാത്രമേ ഉള്ളൂ. കളറും വലിപ്പവും എല്ലാം വ്യത്യാസമാണ്. മഞ്ഞപ്പള്ളത്തി, കറുത്ത പള്ളത്തി എന്നീ രണ്ടിനം ആണ് പൊതുവേ കണ്ടുവരുന്നത്. മുഴുവന്‍ മഞ്ഞനിറമുള്ളവ കേരളത്തില്‍ കുറവാണ്, പകരം കുറച്ച് ഭാഗം മാത്രം മഞ്ഞ നിറമുള്ളവയാണുള്ളത്.

...

മണ്‍സൂണ്‍ മഴക്ക് പാടങ്ങളില്‍ കയറുന്ന പള്ളത്തികള്‍ തുലാമാസമാകുമ്പോഴേക്ക് കുഞ്ഞുങ്ങളുമായി തിരികെ ആറ്റിലേക്ക് കൂട്ടം കൂട്ടമായി എത്തുന്നു. ആ സമയത്ത് വല നിറയെ പള്ളത്തിയെ കിട്ടാറുണ്ടായിരുന്നു. തല കളഞ്ഞ് വെട്ടി വറുത്താല്‍ പെറുക്കി പെറുക്കി തിന്നാല്‍ മതി. മിച്ചം വരുന്നവ ഉണങ്ങി സൂക്ഷിച്ചിരുന്നു.

...

Image Courtesy : Different Websites (Extending thanks)

ആറ്റുവാള (Wallago attu)

2008-11-03T20:58:00.006+04:00

ആറ്റുവാള

ആറ്റുവാള, പുഴവാള, തുടങ്ങിയ പേരുകളില്‍ അറിയപ്പെടുന്ന വാളയെ പറ്റി ആദ്യം എഴുതണം എന്നാണ് കരുതിയിരുന്നത്. കാരണം ഊത്തക്ക് വീശാന്‍ പോകുമ്പോള്‍ ആത്യന്തികമായ ലക്ഷ്യം വാള കിട്ടുക എന്നതായിരുന്നു. വാളയുടെ രുചിയല്ല, അത് വലയില്‍ പെട്ടു കഴിയുമ്പോള്‍ വലയ്ക്കുള്ളില്‍‍ കിടന്നുള്ള "ഇടി" അനുഭവിക്കുക എന്നതാണ് വാളയെ ലക്ഷ്യം വയ്ക്കാന്‍ കാരണം. ഊത്തക്ക് കിട്ടുന്ന വലിയ മത്സ്യങ്ങളില്‍ ഒന്നായിരുന്നു വാള അഥവാ White Sheatfish.

1. 'ത്ലാപ്പ' -ബട്ടര്‍ ക്യാറ്റ്ഫിഷ്- Ompok bimaculatus

വേമ്പനാട്ട് കായലില്‍ കഴിയുന്ന വാളകള്‍ പുതുവെള്ളം കായലില്‍ എത്തിയാലുടന്‍ ശുദ്ധജലം നിറഞ്ഞു കിടക്കുന്ന പാടങ്ങളില്‍ മുട്ട ഇടാന്‍ വേണ്ടി ആറുകളിലേക്ക് യാത്രയാകും . അവിടെ വച്ചാണ് കശ്മന്മാരായ മനുഷ്യര്‍ ഇവയെ പിടിക്കുന്നത്. നിറയെ മുട്ടകളുമായി കിട്ടുന്ന ഇവയ്ക്ക് ഒന്നര മുതല്‍ അഞ്ചു കിലോ വരെ തൂക്കം കാണൂം. ഇതിലും കൂടിയത് ഉണ്ടെങ്കിലും അഞ്ചാറു കിലോ വരെയുള്ളതേ വലയില്‍ കിട്ടാറുള്ളായിരുന്നു. അതു തന്നെ വല കടിച്ചു പൊട്ടിച്ചു കൊണ്ടുപോയില്ലെങ്കില്‍. രാത്രി ആണ് വാളയെ കൂടുതല്‍ കിട്ടിയിരുന്നത്.

2. ആറ്റുവാള

ഞങ്ങളൂടെ നാട്ടില്‍ ആറ്റില്‍ തടവല ഇട്ടിട്ട് ആണ് വീശുന്നത്. ഈ തടവല വെള്ളത്തിനു മേലെ ഒന്നു രണ്ടടി ഉയരത്തില്‍ നില്‍ക്കും. എങ്കിലും വാളകള്‍ ഇതിനു മുകളില്‍ കൂടി, ഡോള്‍ഫില്‍ ചാടുന്ന പോലെ ചാടി പോകുന്ന കാണാം. ഇങ്ങനെ ചാടുന്നതിനെ പിടിക്കാന്‍ തടവലക്ക് പുറകില്‍ ആട്ടു തൊട്ടില്‍ പോലെ "ചാട്ടവല" കെട്ടുന്നവരുമുണ്ട്. ആറ്റുവരമ്പില്‍ ചാടി വീണ് പോലും വാളയെ ചിലപ്പോള്‍ കിട്ടാറുണ്ട്.

ഇവയുടെ വായ നിറച്ചും ചെറിയ ചെറിയ പല്ലുകള്‍ ആണുള്ളത്. കൈ എങ്ങാനും വായില്‍ പെട്ടുപോയാല്‍ കുറെ തൊലി പോകാതെ തിരിച്ചു കിട്ടാന്‍ പ്രയാസം. മാംസത്തിന് ബലം കുറവാണ്. കറിക്ക് മാത്രമേ കൊള്ളാവൂ എന്നാണ് എന്റെ അഭിപ്രായം.

4.

5.

നോട്ട് : ഇവന്റെ ശാസ്ത്രനാമം കണ്ടോ Wallago attu . ഏതോ മലയാളി സായിപ്പിന് ആറ്റു വാള എന്ന് പറഞ്ഞ് കൊടുത്തത് സായിപ്പ് തിരിച്ചിട്ടതാണെന്ന് തോന്നുന്നു. "വാള്ളഗോ ആറ്റു" !!

Image courtesy : Different Websites

മുശി,മുഷി,മുശു (Catfish, Clarias Batrachus)

2008-11-02T21:48:00.011+04:00

മുശി

മുഷി , മുശി, മുഴി, മുഴു, മുശു, മുഷു, ഒറത്തല്‍, വരിച്ചുണ്ടന്‍ മുഷി, മൊഴി, യെരിവാളൈ.. ഇവനെന്തൊക്കെ പേരാണ് ! മുശി എന്നാണ് കോട്ടയംകാര്‍ പറയുന്നത്. പാലായിലും പരിസരങ്ങളിലും ഇവന്‍ മുഷി ആണ്. എറണാകുളത്ത് മുഴി ആണെന്ന് തോന്നുന്നു. തൃശൂരുകാര്‍ക്ക് ഇവന്‍ മുശു അല്ലേ? പല പേരില്‍ അറിയപ്പെടുന്ന ഇവന്‍ പല രൂപത്തിലും ഉണ്ട് കേട്ടോ.

മുശി

പൊതുവേ catfish എന്നറിയപ്പെടുന്നു എങ്കിലും Clarias batrachus, Clarias dayi, Clarias dussumieri, Clarias gariepinus, Plotosus canius, Plotosus limbatus, Plotosus lineatus തുടങ്ങിയ ശാസ്ത്രനാമങ്ങളില്‍ അറിയപ്പെടുന്നതൊക്കെ ഇവന്റെ കുടുംബക്കാരാണ്

മുഷി

പ്രാദേശിക നാമങ്ങള്‍ : മുഷി , മുശി, മുഴി, മുഴു, മുശു, മുയ്യ്, കെണ്ട, ഒറത്തല്‍, വരിച്ചുണ്ടന്‍ മുഷി, യെരിവാളൈ

വെള്ളമില്ലാതെ തന്നെ ഇവ കുറച്ച് ദിവസം വേണമെങ്കില്‍ ജീവിക്കും. അത്രക്ക് ആയുസാണ്. പണ്ടൊക്കെ പാടത്ത് വെള്ളം കയറുന്ന ദിവസം ആളുകള്‍ മീനെ വെട്ടാന്‍ പോകുമ്പോള്‍ ഇവന്‍ ഇങ്ങനെ ഇത്തിരി വെള്ളത്തില്‍ കൂടി ഒക്കെ കയറി വരും, പിന്നെ സംഗതി എളുപ്പമല്ലേ. എന്തിന് നനവുള്ള പുല്ലിന് മേലേ കൂടി വരെ ഇവന്‍ വരും...തന്റെ ചിറകുകളില്‍ കുത്തി പുല്ലില്‍ കൂടി ഇഴഞ്ഞ് ഇവ ചെറിയ പ്രാണികളെ ഒക്കെ തിന്നാറുണ്ട് എന്ന് പറയുന്നു. ഇത് ഒന്ന് കണ്ടു നോക്കൂ.

ഇവയില്‍ തന്നെ Clarias gariepinus എന്ന ആഫ്രിക്കന്‍ മുഷി ആണ് വലിയവനും അപകടകാരിയും. ഇന്ന് നമ്മുടെ നാട്ടിലെ ആറുകളിലും തോടുകളിലും ഇവയെ കാണുന്നുണ്ട്. പല ചെറിയ മീനുകള്‍ക്കും ഭീഷണിയായി മാറുന്ന ഒരു വര്‍ഗ്ഗമാണിത്. ആരൊക്കെയോ കുളങ്ങളില്‍ വളര്‍ത്തിയ ഇവ ഇപ്പോള്‍ പെരുകുന്നു എന്നറിയുന്നു. ആഫ്രിക്കയില്‍ കാണുന്നവ 50Kg വരെ വലുതാകുന്നതാണ്. പെട്ടെന്ന് പെരുകുന്ന ഒരു ഇനം കൂടിയാണിത്.

ആഫ്രിക്കന്‍ മുഷി

Main Courtesy : Fishbase

image courtesy: different websites.

പൂളോന്‍ (Glossogobius giuris)

2008-11-01T21:19:00.005+04:00

പൂളോന്‍

"പൂളോന്‍" (goby fish) എന്നത് വളരെ അപൂര്‍‌വ്വമായി ഞങ്ങള്‍ക്ക് കിട്ടിയിരുന്ന ഒരു മീനാണ്. കഴിഞ്ഞ പോസ്റ്റിന്റെ കമന്റില്‍ കുതിരവട്ടന്‍ പറഞ്ഞതു പോലെ ഇന്നത് കാണാനേ ഇല്ല എന്ന് തന്നെ പറയാം. എങ്കിലും വെള്ളം പൊങ്ങുന്ന സമയത്ത് വേമ്പനാട് കായലില്‍ നിന്നും ഇവന്‍ ഞങ്ങളുടെ ആറ്റില്‍ ഇപ്പോഴും എത്താറുണ്ട് എന്ന് തോന്നുന്നു.

മണല്‍ അധികമുള്ള ആറുകളില്‍ ആണിവയെ കൂടുതല്‍ കാണുന്നത്, ഭാരതപ്പുഴയില്‍ ഇപ്പോഴും ഇവ ധാരാളമുണ്ട് എന്ന് തോന്നുന്നു.

ശാസ്ത്രീയ നാമങ്ങള്‍ : Glossogobius giuris, Bathygobius fuscus

കാഴ്ചയില്‍ വരാലുമായി സാമ്യം ഉണ്ടെങ്കിലും ഇവന്റെ വായക്ക് ഭയങ്കര വലുപ്പം ആണ്. ഏകദേശം എട്ട് പത്തിഞ്ച് നീളം വരെയുള്ളയെ കണ്ടിട്ടുണ്ട്. അതിലും വലുതാകുമോ എന്ന് എനിക്കറിയില്ല. ഇവന്റെ ഒന്നു രണ്ട് ചിത്രങ്ങള്‍ നെറ്റില്‍ നിന്നും പരതി എടുത്തിട്ടുണ്ട്, അവ താഴെ കാണാം.

പൂളോന്‍

കേരളത്തിലെ മത്സ്യങ്ങള്‍‍, വരാല്‍ (Channa striata)

2008-11-01T12:53:00.009+04:00

ചൂണ്ടയിട്ടും, വലവീശിയും ആറ്റു തീരത്ത് കഴിച്ചു കൂട്ടിയ നാളുകളിലേക്ക് ഒരു തിരിച്ചുപോക്ക്. അന്ന് കിട്ടിയിരുന്ന പലതരം മീനുകളെപറ്റിയാണ് ഈ പോസ്റ്റുകള്‍. പല നാട്ടിലും പല പേരുകളില്‍ അറിയപ്പെടുന്ന ഈ മീനുകളുടെ പേരുകള്‍ കമന്റുകളില്‍ നിന്ന് മനസ്സിലാക്കുക എന്നതും അത് ഇനി വായിക്കുന്നവര്‍ക്ക് കൂടി പ്രയോജനപ്പെടട്ടെ എന്ന ചിന്തയുമാണ് ഇങ്ങനെ ഒരു പരമ്പര തുടങ്ങാന്‍ കാരണം. മത്തിക്ക് പോലും പല പേരുകള്‍ ഉള്ളപ്പോള്‍ നാട്ടു മല്‍സ്യങ്ങള്‍ക്ക് എത്ര പേരുകള്‍ കാണും?

വരാല്‍

തുടക്കം വരാലില്‍ നിന്നാകട്ടെ.നമ്മുടെ ജലാശയങ്ങളില്‍ സാധാരണ കണ്ടു വരുന്ന ഒരു മല്‍സ്യമാണ് വരാല്‍ എന്ന് ഞങ്ങള്‍ വിളിക്കുന്ന, കണ്ണന്‍ എന്ന് വടക്കോട്ട് വിളിക്കുന്ന വ്രാല്‍ എന്ന് ചിലര്‍ പറയുന്ന ഈ മീന്‍. Snakehead എന്ന് ഇംഗ്ലീഷില്‍ അറിയപ്പെടുന്ന ഇതിന്റെ ശാസ്ത്രീയ നാമം Channa striata എന്നാണ്. മൂന്ന് കിലോയോളം വലുതാകുന്നതാണ് ഈ മീന്‍ എന്ന് പറയപ്പെടുന്നു. ഒന്നര, രണ്ട് , രണ്ടര കിലോ വരെ ഉള്ളവയെ ഞാന്‍ ധാരാളം കണ്ടിട്ടുണ്ട്.

വരാല്‍

തുലാമാസത്തില്‍ കൃഷിക്കായി കണ്ടത്തിലെ വെള്ളം വറ്റിക്കുമ്പോള്‍ ആറുകളില്‍ എത്തുന്ന ഇവയെ വീശാന്‍ നോക്കി നിന്നിട്ടുണ്ട്. ഏകദേശം മുക്കാല്‍ മണിക്കൂര്‍ കൂടുമ്പോള്‍ വെള്ളത്തിന് മുകളില്‍ വന്ന് മറിഞ്ഞ് വെള്ളമെടുക്കുന്ന ഇവയെ അത് കണ്ടിട്ടാണ് ഞങ്ങള്‍ വലവീശി പിടിച്ചിരുന്നത്. (അതല്ലാതെയും വീശുമ്പോള്‍ കിട്ടിയിരുന്നു). ഒരു കാലത്ത് (തൊണ്ണൂറുകളുടെ ആദ്യം) ഓരുവെള്ളം കയറിയത് മൂലം വേമ്പനാട് കായലിലെ മീനുകള്‍ക്ക് അസുഖം വന്നപ്പോള്‍ ഏറ്റവുമധികം നാശം വന്നത് വരാലുകള്‍ക്കാണെന്ന് തോന്നുന്നു.

വരാല്‍

പ്രാദേശിക നാമങ്ങള്‍ : വരാല്‍, ബ്രാല്‍, കണ്ണന്‍, കൈച്ചില്‍

ഇതിന്റെ തന്നെ കുടുംബത്തില്‍ ഉള്ള ചേറുമീന്‍ അഥവാ പുള്ളിവരാല്‍ (Channa marulius), വാക (Channa micropeltes) എന്നിവയും നമ്മുടെ ജലാശയങ്ങളില്‍ കണ്ടു വരുന്നു. ചേറുമീന്‍ എന്ന് ഞങ്ങള്‍ വിളിക്കുന്ന വരാലിന്റെ വാലിന്റെ ഭാഗത്ത് നല്ല കളര്‍ ഡിസൈന്‍ കണ്‍റ്റു വരുന്നു. നിങ്ങളൊക്കെ ഈ മീനുകളെ എന്താണ് വിളിക്കുന്നത് എന്ന് എനിക്കറിയില്ല.

വാക

ചേറുമീന്‍

ഇവന്റെ ഒരു ചെറിയ വേര്‍ഷന്‍ ഉണ്ട്. ചെറിയ തോടുകളിലും ഒഴുക്കുവെള്ളത്തിലും ഇലകള്‍ക്കടിയില്‍ നിന്നും തല വെളിയിലിട്ടു നില്‍ക്കുന്ന "വട്ടോന്‍" എന്ന് ഞങ്ങള്‍ വിളിക്കുന്ന ഒരു ചെറിയവന്‍. ഇവന് ഒരു ആറിഞ്ച് അല്ലെങ്കില്‍ എട്ടിഞ്ച് നീളമേ കാണൂ. അവനേകൂടി കാണൂ..

വട്ടോന്‍

ആശംസകള്‍

2008-10-31T23:10:00.003+04:00

കേരളത്തെപറ്റിയും , കേരളം ഉള്‍പ്പെടുന്ന ഇന്ത്യയെപറ്റിയും ഉള്ള ഓര്‍ത്തു വയ്ക്കണമെന്ന് തോന്നുന്ന എന്തെങ്കിലും വിവരങ്ങള്‍ കുറിച്ചു വയ്ക്കാന്‍ ഒരിടം. എല്ലാവര്‍ക്കും സ്വാഗതം. ആര്‍ക്കും വിവരങ്ങള്‍ പോസ്റ്റ് ചെയ്യാം. പക്ഷേ അത് വിവരദായകം ആകണം.

ഒരു മീനിന്റെ പടം പോസ്റ്റു ചെയ്തപ്പോള്‍ വന്ന വ്യത്യസ്തമായ പേരുകള്‍ ആണ് ഇങ്ങനെയൊരു ബ്ലോഗ് തുടങ്ങാന്‍ പ്രേരണ തന്നത്. അതിനാല്‍ കേരളത്തിലെ മീനുകളെ പറ്റി തന്നെയാവണം ആദ്യ പോസ്റ്റുകള്‍ എന്ന് വിചാരിക്കുന്നു.

നവംബര്‍ ഒന്ന്. കേരളപ്പിറവി ദിനം. 1956-ല്‍ ഈ ദിവസമാണ് കേരള സംസ്ഥാനം രൂപം കൊണ്ടത്. ഇന്ന് കേരള‍പ്പിറവി ആഘോഷിക്കുന്ന എല്ലാ മലയാളികള്‍ക്കുമായി ഈ ബ്ലോഗ് സമര്‍പ്പിക്കുന്നു.

ലോകത്തെ എല്ലാ മലയാളികള്‍ക്കും കേരളപ്പിറവി ആശംസകള്‍

********* ****** ******** **********

(മലയാളത്തെ 'മലയാല'മാക്കുന്ന, കേരളത്തെ 'കേരലാ' ആക്കുന്ന ആര്‍ക്കും ഈ ബ്ലോഗില്‍ അവകാശമുണ്ടായിരിക്കുന്നതല്ല. )

' ജൈവീകം ' .....

2008-10-31T10:51:00.012+04:00

കൂടുതല്‍ വിവരങ്ങള്‍ക്ക് പടത്തില്‍ ഞെക്കുക

കേരളത്തെപറ്റിയും , കേരളം ഉള്‍പ്പെടുന്ന ഇന്ത്യയെപറ്റിയും ഉള്ള ഓര്‍ത്തു വയ്ക്കണമെന്ന് തോന്നുന്ന എന്തെങ്കിലും വിവരങ്ങള്‍ കുറിച്ചു വയ്ക്കാന്‍ ഒരിടം.

ഒരു മീനിന്റെ പടം പോസ്റ്റു ചെയ്തപ്പോള്‍ വന്ന വ്യത്യസ്തമായ പേരുകള്‍ ആണ് ഇങ്ങനെയൊരു ബ്ലോഗ് തുടങ്ങാന്‍ പ്രേരണ തന്നത്. അതിനാല്‍ കേരളത്തിലെ മീനുകളെ പറ്റി തന്നെയാവണം ആദ്യ പോസ്റ്റുകള്‍ എന്ന് വിചാരിക്കുന്നു.